Чым жа была выклікана арганізацыя мясцовай уладай незапланаванага сходу ў Люсіне? Яшчэ на пачатку года актывісты па ахове лесу сабралі подпісы з патрабаваннем спыніць суцэльную высечку лесу ў радыусе 5 кіламетраў ад вёскі. Такіх знайшлося 115 чалавек. Лісты-патрабаванні разляцеліся да розных адрасатаў, пачынаючы ад Міністэрства лясной гаспадаркі Рэспублікі Беларусь і заканчваючы Камітэтам дзяржаўнага кантролю. Пасля дэталёвага вывучэння пытання Міністэрствам лясной гаспадаркі Рэспублікі Беларусь было рэкамендавана прыпыніць высечку лесу. Некаторы час яна на самай справе не вялася. Аднак потым работы прадоўжыліся, і толькі з-за таго, што былі выяўлены новыя ачагі паражэння лесу жуком-караедам. І тады жыхары аграгарадка зноў узнавілі сваю барацьбу за лес. Яны сабралі дадаткова матэрыялы, падмацавалі іх “старымі” подпісамі і накіравалі ў Камітэт дзяржаўнага кантролю.
На вялікі жаль, тых, хто падпісаўся ў паперах, у актавай зале сельскага Дома культуры сабралася няшмат. Аднак пяць-сем чалавек актыўна ўключыліся ў дыялог з прадстаўнікамі ўлады, смела спрачаліся, даказваючы сваю праўду.
На найбольшую частку пытанняў даваў кампетэнтныя адказы выконваючы абавязкі дырэктара лясгаса Уладзімір Лагвіновіч. Змястоўна, з добрым веданнем справы ён расказаў пра тэрміновае выразанне лесу каля вёскі Люсіна з-за пашкоджання сасны і елкі жуком-караедам, пра высечку і спальванне рэшткаў хворых дрэў, пра ўзнаўленне лесу ў месцах суцэльнай высечкі праз пасадку маладых лясных культур.
— Адзіны спосаб барацьбы з караедам, — даказваў на працягу ўсёй размовы Уладзімір Паўлавіч, — высечка дрэў і спальванне іх рэшткаў.
Найбольш актыўным на сходзе быў Уладзімір Рылка. Па ўсім было відаць, што менавіта ён ініцыіраваў акцыю па ахове лесу ў наваколлях Люсіна. Ва ўсіх пастаўленых ім пытаннях скразной лініяй праходзіла думка: ці будзе пакінуты лес нашчадкам, ці не знішчаць яго ў працэсе барацьбы з захворваннямі дрэў і нарыхтовак?
— Лес быў, ёсць і будзе, — з цвёрдай упэўненасцю ў гэтым канстатаваў Уладзімір Лагвіновіч. — Усё пад кантролем!
Надзвычай сур’ёзны дыялог з жыхарамі вёскі па вынесенаму для праверкі ў Камітэце дзяржаўнага кантролю вёў Алег Данілаў. У яго прамове прагучала думка, што дэталёвы аналіз дакументаў пакуль што не дае падстаў для таго, каб гаварыць пра незаконныя дзеянні з боку Ганцавіцкага лясгаса. Аднак кропка ў гэтай справе не пастаўлена, і калі ў КДК паступіў зварот грамадзян, праверка будзе праведзена.
Сход грамадзян аграгарадка Люсіна не абмежаваўся толькі пытаннямі аховы лесу. Некаторых цікавілі пытанні працаўладкавання, стварэння новых працоўных месцаў, утрымання пенсіянераў на “дэфіцытных” пасадах. Адказы на гэтыя пытанні даваў кіраўнік раёна Уладзімір Бялоў, асобным ён гарантаваў працаўладкаванне. Напрыканцы сходу Уладзімір Уладзіміравіч рэзюмаваў:
— Вы не думайце, што ўлада ад вас адгароджваецца. Праводзяцца “прамыя тэлефонныя лініі”, вядуцца прыёмы грамадзян, ладзяцца самыя розныя формы сустрэч улады з жыхарамі горада і раёна. Звяртайцеся. Лічу, што невырашальных пытанняў няма.
Галіна ПУПАЧ.
0 коммент.:
Дописати коментар