На пачатку кастрычніка абаронцаў прыроды нечакана падтрымаў Аляксандар Лукашэнка. На нарадзе, прысьвечанай праекту новага Жыльлёвага кодэксу, ён абурыўся неабгрунтаваным ушчыльненьнем забудовы на месцах лесапасадак і лясных масіваў, назваўшы гэта «форменным разбоем».
Стадыён — у вёску, мадэрнізацыю — спыніць
У сустрэчы з кіраўніком абласной вэртыкалі бралі ўдзел намесьнік старшыні выканкаму Сяргей Неўмяржыцкі, начальніца аддзелу па працы са зваротамі грамадзян і юрыдычных асобаў Аксана Таранда, дэпутат Палаты прадстаўнікоў Валянціна Курсевіч, галоўны архітэктар Менскай вобласьці Вадзім Нікалаенка. Ад ініцыятыўнай групы — Іван Вайтовіч, Дзьмітры Клімко, Аляксандар Рос-Анашанкаў.
Прадстаўнікі грамадзкасьці выклалі свае патрабаваньні — і, як кажа Іван Вайтовіч, шмат якія зь іх былі пачутыя. У прыватнасьці, Анатоль Ісачэнка паабяцаў прыняць наступныя рашэньні:
- Адмяніць высяканьне лесу ў раёне Цэнтру дзіцячай анкалёгіі, гематалёгіі і імуналёгіі.
- Стадыён, які плянаваўся ў лесе, перамясьціць у Ляскоўку, дзе аматары і раней гулялі ў футбол.
- Адмяніць знос і мадэрнізацыю сядзібнай забудовы па вуліцы Першамайскай у Бараўлянах.
- Не разьмяшчаць камэрцыйныя шматкватэрныя жылыя дамы ў Бараўлянах.
- Адмяніць на ўзроўні Камітэту архітэктуры і будаўніцтва рашэньні па мадэрнізацыі сядзібнай забудовы ў пасёлку Досьледным.
Анатоль Ісачэнка нібыта пагадзіўся з аргумэнтамі, што насьпела неабходнасьць збудаваць другі корпус для перагружанай 1-й Бараўлянскай школы і разгледзець альтэрнатыўныя пляцоўкі для дзіцячых садкоў у крокавай даступнасьці для жыхароў раёну «Зялёны Бор»; паабяцаў, што вырашыць праблему небясьпечных вуліц, якія ператварыліся ў «магістральныя дарогі»; забясьпечыць магчымасьць азнаёміцца з тэхнічным заданьнем па праектаваньні Генэральнага пляну Бараўлянаў.
Лес — пакінуць, поле — задзейнічаць
Пры гэтым зь некаторымі пунктамі сябры ініцыятыўнай групы пагадзіцца ня могуць. У прыватнасьці, настойваюць, што высякаць амаль 5 гектараў лесу для адміністрацыйных патрэбаў непрымальна, а ў якасьці запаснога варыянту прапануюць задзейнічаць вольнае поле. Тут цалкам могуць разьмясьціцца дзіцячы сад, школа, паліклініка, цэнтар дзіцячай творчасьці, фізкультурна-аздараўляльны комплекс, музычная школа.
Улады сьцьвярджаюць, што можна пабудаваць школу і сад так, што лес захаваецца. Аднак у прапанове "Менскпраекту" прапісана, што ад яго застанецца ня больш за 10%.
Яшчэ адна праблема — запраектаваная вуліца, якая злучыць магістраль М2 (Менск — Нацыянальны аэрапорт) з М3 (Менск — Віцебск). Такая вуліца стане транзытнай, праляжа празь сядзібную забудову і адрэжа пасёлак Досьледны ад лесу. Пакуль жыхарам абяцаюць паставіць дарогу ў рэзэрв з катэгорыяй "малой загружанасьці". Аднак прыклад вуліцы Аграрнай, якую таксама абяцалі зрабіць ціхай — а выйшла наадварот, перашкаджае даць веры такім абяцаньням.
У прапанове актывістаў Бараўляны застаюцца зялёнымі, жыльлё ўзводзіцца толькі для чаргавікоў, большая ўвага аддаецца эканамічнаму аспэкту.
Так, ёсьць ідэя разглядаць раён як пляцоўку для фармаваньня мэдычнага кластэра. У Беларусі няшмат месцаў, у якіх прыродныя і экалягічныя выгоды спалучаюцца з прысутнасьцю вядучых мэдустановаў. Маючы напрацаваны аўтарытэт на міжнародным узроўні, варта зрабіць Бараўляны прывабнымі для інвэстыцый і нарошчваньня экспарту высокатэхналягічных паслугаў.
Не — спальнаму раёну, так — інвэстыцыям
Ініцыятыўная група прапанавала ўключыць Бараўляны ў праграму інавацыйнага разьвіцьця краіны на 2016–2020 гады. Праўда, старшыню Менаблвыканкаму гэта не зацікавіла. Актывісты ж лічаць, што ператварэньне прыгараду ў чарговы спальны раён сталіцы не прынясе грамадзтву карысьці ў доўгатэрміновай пэрспэктыве, а зручны момант будзе страчаны.
На думку чальцоў ініцыятыўнай групы, вось што трэба зрабіць дзеля будучыні Бараўлянаў:
- Захаваць унікальную прыроду і навакольнае асяродзьдзе.
- Зрабіць раён больш зручным для жыцьця, забясьпечыўшы насельніцтва неабходнай інфраструктурай.
- Вырашаць жыльлёвую праблему для тых, хто мае ў гэтым патрэбу.
- Стварыць арэол прывабнасьці ня толькі для беларусаў, якія атрымліваюць тут мэдычную дапамогу, але і для гасьцей краіны.
Ініцыятыўная група грамадзянаў выказвае інтарэсы больш як 7 тысяч жыхароў Бараўлянскага сельскага савету. Перадусім гэта насельнікі Бараўлянаў, Ляснога, Ляскоўкі і Досьледнага.
Мэты ініцыятыўнай групы сфармаваныя па выніках вывучэньня карэкціроўкі Генэральнага пляну Бараўлянаў. Больш за 7 тысяч чалавек падпісаліся за будаўніцтва сацыяльных аб'ектаў у крокавай даступнасьці на пустках бяз высечкі лесу, супраць пракладкі транзытных вуліц і дарог па сядзібнай забудове, далейшага ўшчыльненьня шматпавярховай забудовы.
Каб прыцягнуць грамадзкую ўвагу да ратаваньня бараўлянскага лесу, актывісты падалі заяўкі адразу на тры масавыя акцыі, аднак па ўсіх былі атрыманыя адмовы.
03.11.2017 Грамадства Крыніца: Радыё Свабода
ІНШЫЯ НАВІНЫ РУБРЫКІ
http://greenbelarus.info/articles/03-11-2017/baraulyanski-supraciu-starshynya-menablvykankamu-payshou-na-sastupki
0 коммент.:
Дописати коментар